Os cadetes do BM.Culleredo Sweepend son de OURO!!!!!.
Os cullerdenses gañaron o tres partidos do Play-Off disputado en Almeiras e Tarrío durante esta fin de semana e álzanse así co primeiro posto do grupo 2, clasificándose desta forma, directamente para disputar a liga Ouro 2022-23 da categoría.
Se na primeira xornada, o BM.Culleredo Sweepend enfrontábase en Almeiras á SD.Teucro Voz y Sonido Producciones, conseguindo un amplo triunfo nun envite no cal foi dono e señor de principio a fin en todas as fases do xogo, no segundo, ante os Embutidos Lalinense, os anfitrións terían que empregarse a fondo, especialmente nunha segunda parte na que comezaban con desvantaxe de 3 goles (10-13). Nun segundo acto excelente a nivel defensivo (6 goles encaixados), os de Culleredo selaban unha vitoria vital para os seus intereses cun global de 25-19 e un parcial nese tempo de 15-6. Quedaba por tanto poñer a guinda ao pastel na matinal do Domingo ante os mozos das Carnes Doribeiro-Ourense Provincia Termal, esta vez, do mesmo xeito que na xornada do Sábado, no municipal de Tarrío. Nesta ocasión, o partido foi o de menos nivel e con menos ritmo por parte dos dous conxuntos. A fatiga acumulada nos días anteriores e sobre todo, a cómoda vantaxe conseguida desde o principio polos locais, demostrando unha superioridade manifesta nas diferentes fases do xogo, parecía dar a clasificación por concluída e o ritmo tornábase entón máis acougado. Así foi entón que a segunda parte caeu moitísimo canto a intensidade e a concentración, impóndose os ataques ás defensas e sumando goles ambos os conxuntos con escasa resistencia por parte das respectivas retagardas. O marcador foi aumentando entón os algarismos e reducindo as diferenzas ata ese 36-30 final que dá a clasificación ao BM.Culleredo Sweepend.
O equipo soubo sobreporse desde o primeiro día ás importantes baixas de Samuel e Aarón e, especialmente o día do enfrontamento ante o conxunto de Lalín, dar un paso adiante para superar o momento máis crítico da fin de semana. Destacar a aqueles xogadores de primeiro ano como Hugo Díaz, Jaime Serrano, Jorge Outón, e os de segundo, como Anxo Negreira, Iago Vázquez e Álvaro Siso, que este ano participarán tanto en Liga Prata cos outros equipos do club e en Liga Ouro con este Sweepend. Todos eles sumaron minutos de calidade e demostraron o alto nivel como colectivo que pode dar esta xeración. A eles, únense tamén Hugo Rodríguez e Roi Fdez (presente no banco no partido de onte), como outros nomeados que poderán participar este ano en Liga Ouro e o resto de compañeiros dos conxuntos de Prata, que, conformando un total de 41 efectivos, completan tres equipos potentes de grandes traballadores e loitadores con moito futuro por diante. Bravo por estes 41 rapaces, polo que fixeron, polo que están a facer e polo que lles queda por diante.
Esta fin de semana participaron:
Marco González, Hugo Díaz, Atalo Bello, Nico Casal, Iván Sánchez, Josemi Martínez, Adrián Veira, Antón Pérez, Alejo Martínez, Anxo Negreira, Iván Sánchez, Jorge Outón, Álvaro Siso, Jaime Serrano.